Loading ...
Salernitana komplikon edhe më shumë objektivin e mbijetesës në Serie A, pasi nuk shkoi dot përtej barazimit 1-1 në transfertën friuliane ndaj “Bardhezinjve” të Udineze, në “Stadio Friuli”, duke mbetur sërish në vendin e fundit të tabelës së kampionatit italian të futbollit.
Skuadra e drejtuar nga Fabio Liverani i dha fund serisë prej tre humbjesh radhazi, por nuk arriti të marrë tre pikët, ndonëse kaloi e para në avantazh me anë të Tchaouna që në minutë ne 10’ të takimit, mirëpo, Udinese riktheu baraspeshën në fundin e pjesës së parë me anë të Kamara, teksa vlen të theksohet se në minutën e 66’ Ebosele la “Bardhezinjtë” me 10 lojtarë, pasi mori kartonin e dytë të verdhë.
Megjithatë, Salernitana nuk shfrytëzoi epërsinë numerike për të marrë tre pikët, teksa Antonio Candreva humbi edhe një mundësi mjaft të mirë shënimi në sekondat e fundit shtesë dhe tashmë falë këtij rezultati, Salernitana mbetet në vendin e fundit me 14 pikë, ndërsa Udinese në vendin e 15-të me 24 pikë. /i.m /abcnews.al
