“Qeveria ruse nuk ka asnjë interes për të negociuar armëpushim në Ukrainë për momentin pasi ushtria e saj nuk i ka arritur qëllimet e saj ushtarake”. Kështu është shprehur të enjten kryediplomati i Bashkimit Evropian, Josep Borrell.
“Për momentin, Rusia nuk dëshiron të ulet dhe të negociojë asgjë. Do që të pushtojë tokën”, tha Borrell në një intervistë për kanalin spanjoll TVE.
“Rusia kërkon që të rrethojë bregdetin deri në kufirin me Moldavinë dhe të izolojë Ukrainën nga deti. Ajo kërkon të negociojë seriozisht vetëm kur të ketë siguruar një pozicion të fortë.”
Reuters raporton se Borrell tha se Bashkimi Evropian dhe aleatët e tij do të vazhdojnë të ofrojnë ndihmë ushtarake për ushtrinë ukrainase.
“Është e rëndësishme sepse gjithçka do të vendoset në 15 ditët e ardhshme,” tha ai.
“Ajo që do të bëjë histori është aftësia e ukrainasve për të rezistuar.” /abcnews.al/
