Ryan Giggs rrezikon burgun. Legjenda e Manchester United, i cili drejton kombëtaren e Uellsit prej vitit 2018, u arrestua nëntorin e vitit të kaluar për shkak të akuzave për sulme fizike ndaj dy grave, njëra prej të cilave ishte e dashura e tij.
47-vjeçari nga Cardiff mohon akuzat dhe e cilëson veten të pafajshëm. Drejtuesit e Federatës së Futbollit të Uellsit, vendosën ditën e djeshme të konfirmojnë në stole Robert Page, i cili drejton kombëtaren ishullore prej nëntorit të kaluar.
Ky i fundit do të jetë timonieri i Gareth Bale me shokë në Euro 2020. Uellsi është pjesë e grupit A në kompeticionin që do të nisë më 11 qershor dhe do të ketë rivalë skuadra si Italia, Turqia dhe Zvicra.
Po Giggs? Hetimet vazhdojnë dhe vendimi për ish-mesfushorin e madh do të jetë më 28 prill. Mediat angleze raportojnë se Giggs, i cili vazhdon të insistojë se nuk ka kryer asnjë faj, rrezikon burgosjen me pesë vite. /abcnews.al
