Roveri kinez Zhurong ka zbuluar praninë e kratereve të varrosura dhe strukturave të tjera misterioze në nënsipërfaqen e Marsit.
Roveri, ende në gjumë dhe i palëvizshëm pasi nuk arriti të zgjohej siç pritej në dhjetor 2022, në fakt kishte dërguar të dhëna të mbledhura nga një prej dy instrumenteve të tij të radarit që depërtojnë në tokë, të cilat tani janë analizuar në studimin e botuar në revistën Geology dhe të udhëhequr nga Universiteti Kinez i Shkencës dhe Teknologjisë në Macau.
Rezultatet mund të japin të dhëna të reja mbi kushtet klimatike që karakterizonin Planetin e Kuq në të kaluarën, mbi karakteristikat e tij gjeologjike dhe gjithashtu mbi praninë e mundshme të ujit ose akullit.
Zhurong, i nisur në korrik 2020, u ul në Mars në maj 2021 në një zonë të sheshtë të quajtur Utopia Planitia. Në 2022 udhëtoi në jug për gati 2 kilometra, duke eksploruar zonat që kaloi me radarët e saj. Të dhënat e siguruara nga roveri kinez tregojnë dallimet e thella midis nëntokës marsiane dhe hënore. Dhjetë metrat e parë të sipërfaqes së Hënës, në fakt, përbëhen nga shtresa të holla pluhuri ‘tokësor’ pas bombardimeve të mikrometeoritëve, ndaj të cilëve Marsi është më i mbrojtur falë atmosferës së tij të hollë.
“Ne gjetëm shumë duna në sipërfaqen e vendit të uljes,” shpjegon Yi Xu, një nga autorët e studimit të udhëhequr nga Ruonan Chen, “kështu që duket se zona Utopia Planitia u varros shpejt nga rëra, e cila e mbronte atë nga erozioni, kjo shpjegon krateret e zbuluara nën sipërfaqe”. Ndërkohë, statusi i roverit kinez nuk dihet ende, pasi imazhet e marra nga sonda Mars Reconnaissance Orbiter (MRO) e NASA-s konfirmuan palëvizshmërinë e tij.
Shkencëtarët shpresojnë se ai do të zgjohet pasi kushtet në lidhje me dritën dhe temperaturën përmirësohen në zonën ku ndodhet. /abcnews.al
