Juventusi hasi probleme vetëm në pjesën e parë përballë Cagliarit. Bardhezinjtë nuk u përmbajtën në 45 minutat e dyta dhe shënuan katër herë për ta nisur vitin 2020 me një “poker”.
Njeriu i ndeshjes ishte Cristiano Ronaldo me tre golat e tij, teksa është ngjitur në shifrën e 13 golave, gjashtë me pak se Immobile i Lazios. Portugezi u tregua modest dhe i sinqertë në prononcimin e dhënë pas ndeshjes.
Tre golat e gëzojnë, por rëndësi ka Juventusi dhe përmirësimi i skuadrës. Në darkë zbret Interi në fushë dhe CR7 shpreson që ekipi i Contes të humbasë. Diçka e tillë do të sillte kryesimin e vetëm të Juventusit me 45 pikë, tre më shumë se zikaltrit.
“Gjëja më e rëndësishme është skuadra, luajtëm mirë dhe krijuam shumë raste. Jam i lumtur me tripletën, por rëndësi kishte të fitonim për t’i bërë presion Interit. Po përmirësohemi nga ndeshja në ndeshje, jo vetëm në mbrojtje, por edhe në repartet e tjera.
Jemi një skuadër e kompletuar, por duhet të vazhdojmë të përmirësohemi në çdo aspekt. Napoli-Inter? Nuk e di nëse do e shoh si ndeshje, por shpresoj që Interi të humbasë“, përfundon Cristiano Ronaldo, i cili sot gjeti trigolëshin e parë në Serie A. /abcnews.al
