Kristiano Ronaldo nuk pati një ditë të bukur në Serinë A. Superylli portugez humbi një penallti, ndonëse Juventusi arriti të fitonte dhe të shkëputej në krye.
Stefano Sorrentino është një emër që do të mbetet në kujtesën e CR7-ës. Superylli portugez i mbylli dy ndeshjet në Serinë A, përpara portierit veteran të Kievos, pa arritur t’i shënonte asnjë gol.
Pasi u ndalua prej 39-vjeçarit në Veronë në fazën e parë, në fitoren e vështirë 3-2, Kristiano Ronaldo pati mundësinë më të mirë për ta ndëshkuar.
Në minutën e 53-të në stadiumin “Alianc Arena” të Torinos, mori përsipër të gjuante një penallti.
Sorrentino e priti të djathtën e tij. Kristiano nuk është mësuar të gabojë penalltitë, dhe aq më pak që ndonjë portier të mos i lejojë golin për një vit sportiv, por duhet të mësohet.
“Ishte e shkruar diku, që ai nuk duhej të shënonte, – komentoi trajneri Alegri, – mund t’iu zbuloj se Kristiano e humbi një penallti edhe në seancën e nxemjes paraditen e ndeshjes. Janë gjëra që ndodhin, ndërsa jam shumë I kënaqur nga skuadra që fitoi bindshëm, duke lejuar shumë pak rreziqe”.
“La Gazeta delo Sport”: Festë e Juves, vetëm CR7-ta nuk argëtohet!
“Il Korriere delo Sport”: Juve, kuota 10! Shkatërrohet Kievo, 18 fitore në 10 ndeshje, Alegri dëshiron të fitojë para kohe titullin e 8-të radhazi!
Gjithsesi, Juventusi nuk gaboi, por ia doli 3-0, me rrjeta të shënuara nga Dagllas Kosta (13’), Emre Xhan (45’) dhe Daniele Rugani (84’).
Xhan ishte lojtari më i mirë në fushë, i ndjekur pikërisht nga Sorrentino.
Ronaldo mbeti në kuotën e 14 golave në Serinë A, këtë edicion, baraz me Duvan Zapatën e Atalantës dhe Fabio Kualjarelën e Sampdorias.
Juventusi, ndërkaq rivendosi epërsinë e 8 pikëve ndaj Napolit të vendit të dytë, duke kryesuar me 56 pikë, pas 20 ndeshjeve të luajtura në kampionat. /abcnews.al
