Bashkimi Evropian ka propozuar një program gjithëpërfshirës shumëvjeçar prej 1.6 miliardë euro për të mbështetur rimëkëmbjen dhe zhvillimin e Palestinës, si dhe për të thelluar angazhimin ndaj një zgjidhjeje të qëndrueshme me dy shtete. Lajmi u bë i ditur sot nga Përfaqësuesja e Lartë e BE-së për Punët e Jashtme dhe Politikën e Sigurisë, Kaia Kalas, gjatë konferencës për shtyp pas përfundimit të Këshillit të Punëve të Jashtme në Luksemburg.
Programi, i cili do të mbulojë periudhën 2025–2027, është strukturuar në tre shtylla kryesore dhe synon të ndihmojë në ndërtimin e qëndrueshëm të institucioneve palestineze, rimëkëmbjen e rajoneve të prekura nga konflikti dhe nxitjen e sektorit privat.
Fokusi kryesor i kësaj shtylle është mbështetja e funksionimit të administratës publike palestineze dhe ofrimit të shërbimeve për qytetarët. Ndihma do të jetë e kushtëzuar me progresin në reforma kyçe si qëndrueshmëria fiskale, qeverisja demokratike dhe zhvillimi i sektorit publik dhe privat.
Fondet do të përdoren për projekte specifike në Bregun Perëndimor, Jerusalemin Lindor dhe Gazën, me fokus në ujë, energji dhe infrastrukturë. Një pjesë e veçantë e fondeve – 82 milionë euro në vit – do të shkojë për Agjencinë e OKB-së për Refugjatët Palestinezë (UNRWA), për të garantuar shërbime themelore për refugjatët palestinezë dhe për të ruajtur stabilitetin humanitar.
Përmes Bankës Evropiane të Investimeve (EIB), BE synon të fuqizojë ekonominë palestineze duke lehtësuar aksesin në financim për bizneset lokale. Financimi do të jetë subjekt i miratimit nga organet drejtuese të EIB.
Komisioni Evropian njoftoi gjithashtu krijimin e një platforme të dedikuar donatorësh, e cila do të shërbejë si forum për koordinimin e mbështetjes ndërkombëtare dhe për prezantimin e reformave nga Autoriteti Palestinez. Qëllimi është të sigurohet transparenca dhe efektiviteti në zbatimin e projekteve dhe reformave.
“Ky është një angazhim i qartë i BE-së për të mbështetur popullin palestinez në një moment tejet kritik dhe për të forcuar përpjekjet për paqe dhe zhvillim të qëndrueshëm,” deklaroi Kalas.
/ abcnews.al
