Kryesocialisti Edi Rama ka siguruar një fitore të thellë në zgjedhjet parlamentare, duke marrë një shumicë që i garanton mandatin e radhës dhe e kthen atë në liderin më jetëgjatë të Shqipërisë demokratike.
“Është përvoja më përulëse e jetës sime – dhe vjen në një moment historik për Shqipërinë … si një shtet anëtar i ardhshëm i Bashkimit Evropian”, tha Rama për POLITICO, i cili e bëri premtimin e anëtarësimit në BE deri në vitin 2030 një element kyç të fushatës së tij.
Partia Socialiste duket se ka siguruar një shumicë tw konsiderueshme me rreth 82 vende – shumë më tepër se 71 mandate të nevojshme për të qeverisur e vetme, në parlamentin me 140 vende të Shqipërisë. Edhe pse Shqipëria ka një sistem shumëpartiak, pushteti wshtw alternuar midis dy forcave kryesore – socialistëve dhe Partisë Demokratike të qendrës së djathtë – që nga rënia e komunizmit në fillim të viteve 1990.
Fakti që demokratët kishin punësuar Chris LaCivitën, të fushatës republikane i cili ideoi fitoren rikthyese të Donald Trump në zgjedhjet e vitit 2024 në SHBA, nuk duket se e shqetësoi Ramën.
“Marrja e LaCivitës dhe të menduarit se mund të bëhesh Trump është si të punësosh një parukier në Hollywood dhe të mendosh se do të bëhesh Brad Pitt,” tha Rama.
Ai i vuri në dyshim demokratët për besimin se “vetëm për shkak se dikush punoi për Trump, ai mbart një lloj fuqie magjike të Trumpit në shoqëri… në çdo rast, ishte një komedi që ia vlente të shihej”.
Votat ende po numërohen dhe rezultatet e plota paraprake priten të martën, por me mbi 85 përqind të qendrave tw numëruara, rezultati nuk ka gjasa të ndryshojë ndjeshëm. Kryeministri, i cili është shumë aktiv në mediat sociale, e kaloi pjesën më të madhe të së hënës duke postuar nga Shtëpia e Evropës në Tiranë, ku përgatitjet janë në kulmin e tyre për samitin e Komunitetit Politik Evropian që do tw zhvillohet këtë javë.
Presidentja e Komisionit Evropian Ursula von der Leyen dhe Presidenti i Këshillit Evropian António Costa do të udhëtojnë për në Shqipëri për edicionin e gjashtë të samitit — një iniciativë e nisur nga Presidenti Francez Emmanuel Macron për të bashkuar vendet e BE-së dhe ato jo-anëtare të BE-së për bisedime mbi sigurinë, bashkëpunimin ekonomik dhe stabilitetin rajonal. Gjithashtu të pranishëm do të jenë përfaqësues të vendeve të tjera që shpresojnë të bashkohen me BE-në, si Ukraina dhe Gjeorgjia.
“Është një nder i madh të mirëpresim të gjithë kontinentin tonë demokratik në Tiranë – përfshirë Ukrainën dhe mikun tim të dashur Volodymyr Zelensky,” tha Rama.
Vendet e Ballkanit Perëndimor kanë përvojë në procesin e gjatë dhe kompleks të përgatitjes për anëtarësim në BE, me disa që kanë kaluar dekada duke u përpjekur me ligjet dhe institucionet publike duke kërkuar të minimizojnë ndërprerjet në bllok pas hyrjes.
I pyetur nëse Shqipëria kishte ndonjë këshillë për Ukrainën, e cila është aspirante për në BE, Rama theksoi statusin unik të Ukrainës në procesin e pranimit.
“Shqipëria nuk pretendon t’i ofrojë mësime Ukrainës. Përkundrazi, ne mund të mësojmë vetë nga Ukraina – nga çmimi që populli i saj është i gatshëm të paguajë për rrugën e tyre drejt Perëndimit dhe Bashkimit Evropian”, tha ai.
Rama, i njohur nw rolin e mikpritësit të sjellshëm ndaj udhëheqësve perëndimorë, përforcon premtimin e tij kryesor zgjedhor se ai është i vetmi person që mund ta çojë Shqipërinë në prag të anëtarësimit në BE brenda pesë vjetësh.
Ndërkohë, partia kryesore e opozitës, Demokratët — të cilët duket se kanë siguruar rreth 52 vende në parlament — ia hodhën fajin rezultatit asaj që e quajtën kontroll të rrënjosur të Partisë Socialiste mbi institucionet dhe përpjekjeve të supozuara për të ndikuar votuesit.
“Nëse dhjetëra mijëra njerëz punësohen në këmbim të votës së tyre… nëse qendrat e votimit janë të rrethuara nga besnikë të partisë nga të gjitha anët… atëherë e dimë se si t’i quajmë këto zgjedhje”, tha në një deklaratë udhëheqësi i Partisë Demokratike, Sali Berisha.
Duke shpresuar të organizojë një rikthim politik të ngjashëm me rikthimin e Trump në vitin 2024, Partia Demokratike e qendrës së djathtë e Shqipërisë solli strategun e fushatës së Trump, LaCivita, për të ndihmuar në hartimin e mesazhit të tyre dhe për të drejtuar fushatën e tyre.
LaCivita i përforcoi pretendimet e Berishës për manipulim zgjedhjesh në një postim në X, duke ndarë një raport nga televizioni lokal i lajmeve Syri TV në lidhje me një zyrë të supozuar për blerjen e votave të Partisë Socialiste të vendosur pranë një qendre votimi në Tiranë.
“Ja se si duket vjedhja e votave në Shqipëri… me mirësjellje të qeverisë së drogës së Edi Ramës”, thuhej në postimin e LaCivitës.
Misioni i monitorimit të zgjedhjeve i Organizatës për Siguri dhe Bashkëpunim në Evropë tha të hënën se zgjedhjet u zhvilluan në një mënyrë gjithëpërfshirëse dhe transparente, por vuri në dukje se qëndrimi i gjatë i Partisë Socialiste në qeveri “krijoi një avantazh të padrejtë në pushtet”.
Por për Ramën, i cili po shijon fitoren e tij, vetëm një gjë ishte e rëndësishme: ndjenja e votuesve.
“Ata kanë dërguar një mesazh të fuqishëm dhe të thjeshtë: ‘Ne duam të arrijmë më në fund lartësitë e Bashkimit Evropian — dhe mund ta bëjmë këtë vetëm me ju dhe me Partinë Socialiste!’”/abcnews.al
