Kryetari i Prishtinës, Përparim Rama ka thënë sot se janë në proces të përzgjedhjes së drejtorëve dhe nënkryetarit që do të vijnë nga Partia Demokratike e Kosovës.
“Jam në proces të përzgjedhjes”, tha ai me rastin e vizitës së shtëpisë-shkollë të familjes Hertica.
Sa i përket shtëpisë – shkollë të Herticëve, Rama tha se Komuna e Prishtinës ka një projekt për parandalimin e shkatërrimit të tyre.
“Këtë monument me vlerë historike, Kuvendi Komunal i Prishtinës ka shpallur muze me emrin ‘Muzeu shtëpi-shkollë’. Pas shumë procedurave të tenderimit, projekti ideor është përzgjedhur tash, dhe është finalizuar nga Komuna e Prishtinës, tash jemi duke vazhduar procedurat të mëtejme të projektit të përzgjedhur në mënyrë që sa më parë ky objekt muze të fillojë punën dhe t’i mirëpres vizitorët…I kemi edhe si pjesë të buxhetit dhe të plan programit që këto duhet të fuqizohen që ta parandalojmë edhe shkatërrimit të tyre, sepse më shumë kohë që merr për funksionalizmin për muze teatër aq më keq. Pra, ne duhet ta përshpejtojmë procedurën dhe me këtë jemi duke u marrë.”
Familja Hertica është njëra prej familjeve e cila ka dhuruar shtëpinë e saj për të arsimuar brezin gjatë kohës së luftës kundër Serbisë. Mësimi është mbajtur në disa dhoma, ku nxënësit në atë kohë janë detyruar të uleshin edhe nëpër sfungjerë.
Dhe i pari i Prishtinës vlerësoi lart kontributin e Herticëve dhënë për arsimimin e shqiptarëve, raporton Kp.
“Në këtë vit jubilar një falënderim dhe mirënjohje tejet e madhe dhe fort e përzemërt u detyrohet para së gjithash vetë familjeve pronare dhe të këtyre pronave për kontributin e tyre të jashtëzakonshëm. Përkundër rreziqeve që u kanoseshin këto familje si familja Hertica, i shndërruan shtëpitë e tyre në vlera të diturisë dhe të qëndresës duke ndërmarrë një akt aq fisnik e aq bujar që na i thek zemrat edhe sot e kujtojmë pas kaq kohesh.
Për më shumë, këta njerëz nuk është se e dinin që vendosën t’i ofrojnë këto prona, dhe arsimi tashmë i zhvendosur nga institucionet shkollore tek shtëpitë e tyre do të vijonte jo për një vit as dy por gati për një dekadë të tërë, duke i kthyer kështu shtëpitë dhe vetë pronarët në shënjestra të sigurta në syrin e pushtuesve. Kjo është edhe arsyeja se pse sapo gjetën mundësinë ata ia vunë flakën edhe kësaj shtëpie-shkollë para të cilës ndodhemi sot”, tha ai.
Ish-drejtori i asaj kohe i shtëpisë-shkollë, Avdyl Gashi, thotë se në Prishtinë kanë qenë 12 objekte të cilat janë shndërruar në shtëpi-shkolla. Madje Gashi tregon edhe periudhën e vështirë të asaj kohe pasi që arsimtarët që mbanin mësime, më pas duhej të shkonin në vendin tjetër. /abcnews.al/
