Kjo është fundjava e fundit gjatë së cilës qytetarët mund të vizitojnë arkivolin e Mbretëreshës Elizabeth II. Radha për në Westminster Hall, ku arkivoli i saj do të shtrihet deri të hënën kur të bëhet funerali i saj, është i madh.
Vdekja e Mbretëreshës Elizabeth II, shumë e njohur pas 70 vitesh në fron, shkaktoi trishtim të madh në Britani. Radha e njerëzve për t’i bërë nderimet e tyre arkivolit të saj u shtri për disa kilometra përgjatë Thames të premten, me qeverinë britanike që vlerëson se njerëzit do të duhet të presin më shumë se 22 orë.
Publiku mund t’i bëjë nderimet e tyre Mbretëreshës së ndjerë deri në orën 06:30 të hënën.
Natën e kaluar ishte “vigjilja e princave”: katër fëmijët e Elizabeth, Mbreti Charles III, Anne, Andrew dhe Edward, zunë vendet e tyre rreth arkivolit të saj, siç kishin bërë në Edinburg.
Të veshur me uniforma ushtarake dhe me kokë të ulur, ata qëndruan aty për një çerek ore, të rrethuar nga turma që priste t’i bënte nderimet arkivolit të Elizabeth II, i cili ndodhet në dhomën më të vjetër të Parlamentit Britanik.
Andrew, të cilit i janë hequr shumica e titujve ushtarakë pas një skandali seksual, u lejua të vishte uniformën e tij ushtarake për këtë rast.
Tetë nipërit e mbretëreshës, përfshirë princat William dhe Harry, pritet të bëjnë nderimet e tyre në arkivolin e saj sot./abcnews.al
