Emisioni VETTING/ Nga Luljeta Progni
Deklarata e prokurorit Sokol Stojani, ku distancon Prokurorinë e Përgjithshme nga procesi i gjetjes së eshtrave të të zhdukurve me forcë në diktaturë, duke i mëshuar “ligjeve të kohës”, rrëzohet nga vetë ministri i Drejtësisë Ulsi Manja, i cili në një intervistë për “Vetting” vë theksin te fakti se në diktaturë, pati jo pak persona të dënuar pa gjyq.
Lexo edhe: 6 mijë të zhdukur në diktaturë, familjarët pa përgjigje, prokurori: U dënuan me ligjet e kohës
Megjithatë, prokurori Stojani këmbëngul duke përjashtuar rolin e Prokurorisë pasi sipas tij, çështja e të zhdukurve është administrative dhe jo penale.
Lexo edhe: “Kërkohet një varr”, Mesila Doda për të zhdukurit në diktaturë: Koha për t’u shkëputur nga e kaluara
Edhe në rastet kur një çështje e kësaj natyre mund të klasifikohet administrative, ministri i Drejtësisë, sqaron se Prokuroria ka një rol për të luajtur.
Shqipëria ka një bazë ligjore për personat e zhdukur, ku ka miratuar disa konventa ndërkombëtare dhe njeh vendimet e gjykatës ndërkombëtare. Por në 30 vite procesi i zhvarrimeve nuk ka nisur për shkak se institucionet kanë refuzuar zbatimin e ligjit.
Lexo edhe: “Ku është trupi i tim eti”, amaneti që shoqëroi Juli Shllakun deri në vdekje për babanë e pushkatuar
Për të shpejtuar këtë proces Autoriteti për informim mbi dokumentet e ish-Sigurimit të Shtetit ka tentuar që të bëjë një marrëveshje me Ministrinë e Brendshme dhe Prokurorinë e Përgjithshme. Përfaqësuesi i Autoritetit na tregon arsyet Pse Prokuroria refuzon ta nënshkruaj këtë marrëveshje.
Ndërsa ministri i Drejtësisë paralajmëron miratimin e një vendimi të këshillit të ministrave që do të detyrojë të gjitha institucionet që kanë detyrimin të kryejnë rolin e tyre për të nisur sa më shpejt kërkimin e eshtrave të të zhdukurve gjatë diktaturës./ Abcnews.al
