Qemail Elshani erdhi me bujë te Partizani para disa kohësh, por mesfushori me tipare sulmuesi iku menjëherë, pa mundur të japë kontribut për të kuqtë. Ai ka shkëlqyer me skuadrën e Feronikelit, ku edhe ka dalë kampion, ndërkohë që i është bashkuar futbollistëve të tjerë që gjatë kësaj periudhë në izolim kanë treguar ngjarje të çuditshme nga karriera e tyre.
Për “GazetaBlic Sport” ai ka treguar një episod me trajnerin Gani Sejdiu, ndërkohë që Elshani ka qenë së bashku me Lulzim Doshlakun. “Në sezonin 2014/15, duke udhëtuar me stafin e skuadrës së Feronikelit me autobus, unë dhe Lulzim Doshlaku ishim ulur afër trajnerit Gani Sejdiu.
Për të kaluar kohën rrugës, kishim marrë hurme dhe banane për të ngrënë. E pyetëm disa herë trajnerin se a dëshiron pak hurme dhe përgjigja e tij ishte gjithmonë jo. Kjo për shkak se ai gjithmonë kujdesej për ushqimin e tij.
Ne filluam të bëjmë sikur janë tepër të shijshme, ndërsa atij veç i shtohej edhe më shumë dëshira për ta ngrënë një. Pak pa mbaruar kutia, e mori një dhe na bërtiti: “Pse more idiotë nuk m’i dhuruat më herët, sa të shijshme qenkan”, tregon Elshani. /abcnews.al
