Policia britanike njoftoi sot se bëri 52 arrestime gjatë operacionit të tyre gjatë ceremonisë së kurorëzimit të mbretit Karl.
Të arrestuarit po mbahen për një sërë veprash, duke përfshirë sherre, prishjen e qetësisë dhe komplot për të shkaktuar shqetësim publik.
Në një deklaratë, policia e Londrës tha se të gjithë të arrestuarit mbeten në paraburgim dhe mbrojti veprimin e tyre për të kryer arrestimet e shumë kritikuara, duke thënë se ata kishin informacione për planet për të prishur ngjarjen historike.
Forcat e zbatimit të ligjit arrestuan dhjetëra ambientalistë që planifikonin aksione përgjatë rrugës së kortezhit mbretëror, si dhe të paktën gjashtë aktivistë kundër monarkisë, duke përfshirë udhëheqësin e Republikës Graham Smith, i cili kishte organizuar një demonstratë në sheshin Trafalgar.
Policia Metropolitane e Londrës, njoftoi se kishte arrestuar 52 persona, të cilët ndodhen në paraburgim për çrregullime publike. Gjatë pasdites të së shtunës, tha se “kishte marrë informacione që tregonin se protestuesit donin të prishnin procesionin mbretëror”.
“Ato përfshinin informacione që tregonin se individët donin të përpiqeshin të vandalizonin monumentet me bojë, të shkelnin barrikadat dhe të prishnin trafikun zyrtar,” tha Scotland Yard.
Kjo duket se aludon për llojin e veprimeve të lëvizjes mjedisore Just Stop Oil, aktivistët e së cilës u arrestuan, por policia nuk e shpjegon qartë arrestimin e protestuesve antimonarki, të cilëve iu konfiskuan pankartat “Jo mbreti im”.
Megjithatë, kjo nuk i ndaloi qindra anti-monarkistë të demonstronin ndërsa procesioni mbretëror po ndodhte.
Aksioni i policisë, në të cilin ishin vendosur më shumë se 11,000 oficerë në terren sot, u kritikua nga grupet e të drejtave të njeriut.
“Ne kemi për detyrë të ndërhyjmë kur protestat kthehen në delikuencë dhe rrezikojnë të shkaktojnë përçarje serioze,” tha Karen Findlay, i cila koordinoi operacionin e policisë, sipas një njoftimi për shtyp të policisë.
“ Kurorëzimi është një ngjarje që ndodh një herë në gjeneratë dhe është një element kyç i vlerësimit tonë”, shtoi ai.
/abcnews.al
