Ishte një befasi, por ai ishte hero i natës në “Etihad Stadium”.
Të gjithë prisnin shumë nga Haaland, Vinicius, Bellingham apo De Bruyne, por hero i Real Madridit në ndeshjen e kthimit çerekfinale të Ligës së Kampionëve ishte Andriy Lunin.
Portieri i madrilenëve pas lojës ka folur për “MovistarTV”, mbi të gjitha për llotarinë e penalltive, e cila e pa protagonist me dy pritje, të Bernardo Silvës dhe të Mateo Kovacicit,
“Jam i rraskapitur, ishte ndeshja më angazhuese e karrierës sime, mjaft vuajtëse. U jam mirënjohës shokëve të skuadrës, të cilët kanë punuar fort në mbrojtje. Tash jemi në gjysmëfinale dhe është një ndjenjë mjaft e bukur”, deklaroi fillimisht portieri ukrainas.
“Penalltitë? Më duhej të rrezikoja tek njëri prej kundërshtarëve duke qëndruar në vend dhe menduam për Bernardo Silvan. Kishte edhe opsione të tjera, por e zgjodha atë dhe shkoi mirë. Ka ndeshje në të cilat duhet të vuash, nuk mund të jesh gjithmonë në top dhe ta kesh kontrollin e topit. Ishte një eksperiencë e madhe, një sakrificë dhe mund për 120 minuta”, përfundoi Lunin.
Reali u kualifikua në gjysmëfinale të Championsit pasi e eliminoi Manchester Cityn pas penalltive.
Dy ndeshjet çerekfinale mes tyre përfunduan barazim 3-3 dhe 1-1, prandaj edhe fituesin e përcaktuan 11 metërshat.Aty, hero i “Los Blancos” ishte Andriy Lunin./h.ll/abcnews.al
