Presidenti ukrainas Volodymyr Zelensky ka urdhëruar mbylljen e dy stacioneve televizive të opozitës, tha zyra e tij në një deklaratë. Vendimi ka të bëjë me Ukrlive.tv dhe Perviy Nezavisimiy. Koalicioni opozitar pro-rus dënoi vendimin e presidentit, duke e quajtur atë një goditje për lirinë e shtypit. Bashkëpronar i televizioneve mësohet se është deputeti Nestor Sufritz , i cili i përket këtij fraksioni. Ai tha se do të apelojë te kreu i shtetit kundër vendimit.
Masa e vendosur nga Volodymyr Zelensky është e vlefshme për pesë vjet. Në shkurt, presidenti, popullariteti i të cilit është jashtëzakonisht i ulët për momentin, ndaloi tre stacione të tjera televizive opozitare, pavarësisht kritikave të forta. Edhe ata konsideroheshin si mjete propagandistike të koalicionit, i cili ka bazën e tij politike në lindje dhe jug të vendit.
Në gusht, qasja në faqen e internetit të opozitës strana.ua u bllokua. Në një dekret tjetër, Presidenti Zelensky njoftoi se do të ndërmerren veprime për të kundërshtuar “informacionet e rreme” të përhapura nga Rusia.
Qeveria aktuale në Kiev konsideron se është në luftë me Moskën. Javët e fundit, përqendrimi i trupave ruse në kufirin me Ukrainën ka shkaktuar shqetësim të madh në Perëndim.
Marrëdhëniet Ukrainë-Rusi u prishën në vitin 2014, pasi Rusia aneksoi gadishullin ukrainas të Krimesë, të cilin Kievi kërkon të kthehet. Sipas autoriteteve ukrainase, rreth 14,000 njerëz janë vrarë në luftime. g.v/abcnews.al
