Loading ...
Napoli nuk shkoi më shumë se një barazim pa gola në transfertën kundër Torinos dje pasdite dhe kjo ishte ndeshja e dytë brenda pak ditësh që sulmi i ekipit të Ancelotti nuk arrin të shënojë.
Me të njëjtin rezultat përfundoi edhe dueli në Belgjikë kundër Genkut. Përveç mungesës së fitores, në ndeshjen e Champions League ra në sy edhe mungesa e Lorenzo Insignes në formacion dhe stol.
Kapiteni u rikthye titullar në sfidën e djeshme, por zërat e një raporti të krisur mes tij dhe Ancelotti janë shtuar shumë. I fundit që i bashkohet këtij kori është edhe Antonio Cassano.
Barezi i famshëm shkon edhe më tej dhe e e lidh situatën me Hirving Lozanon, blerjen më të rëndësishme të Napolit gjatë merkatos së verës. Cassano shpreh bindjen e tij në prononcimin e dhënë për emisionin Tiki Taka se trajneri nuk e duron dot më sulmuesin e kombëtares italiane.
“Ancelotti nuk e sheh me sy Lorenzon dhe ky është problemi më i madh. Besoj se edhe Lozano u ble, sepse trajneri shpresonte që Insigne do të largohej”, komenton Antonio Cassano. /abcnews.al
