Policia greke ka zbuluar 41 emigrantë të fshehur në një kamion frigorifer në autostradën në veri të Greqisë. Lajmi është konfirmuar nga zyrtarë të policisë.
Sipas autoriteteve policore, emigrantët, shumica e tyre afganë, nuk kanë pësuar lëndime gjatë transportit, pasi sistemi i ftohjes nuk ishte i ndezur.
Policia ndaloi kamionin për një kontroll të rregullt, në një autostradë afër qytetit verior Grek të Xanthi.
Pas zbulimit të emigrantëve brenda kamionit, policia arrestoi shoferin dhe emigrantët u dërguan për identifikim në një stacion të policie.
Shumica e emigrantëve që arrijnë në Greqi, largohen nga luftërat në Siri, Irak dhe gjetkë. Autoritetet greke po përpiqen të përballojnë një rritje të numrit të emigrantëve në ishujt e saj lindorë.
Kampet e financuara nga BE-ja në Greqi, janë të mbipopulluara dhe në shumë raste janë shënuar incidente të dhunshme dhe viktima.
Rreth 34,000 azilkërkues dhe refugjatë mbahen brenda kampeve në ishujt e Egjeut afër Turqisë.
Muajin e kaluar, 39 migrantë, të gjithë vietnamezë, ishin u gjetën pa jetë në një kamion frigorifer afër Londrës. /abcnews.al
