Humbja 2-1 me Basaksehir në Champions League, ka shkaktuar zhgënjim të madh te Manchester United. Kritika të shumta ndaj trajnerit Solskjaer dhe djemve të tij, teksa më i ashpër është treguar Paul Ince.
Ish-mesfushori i “Djajve të Kuq” është ndalur te forma e dobët e Paul Pogba në prononcimin e dhënë për Ladbrokes. “Unë e dashuroj Pogba dhe mendoj se ai është një lojtar i nivelit botëror. E kemi parë edhe te Juventusi se çfarë lloj futbollisti është.
Por, prej momentit që u rikthye te Manchester United, ai ka krijuar vetëm probleme. E dimë të gjithë se çfarë ndodhi kur trajner ishte Mourinho. Më pas janë historitë e vazhdueshme me agjentin e tij.
Gjithmonë i ndodh diçka këtij lojtari. Paraqitjet në fushë nuk kanë qenë pozitive, edhe tifozët i kanë dalë kundër. Nëse do ta kisha shok skuadre, do i thoja këto fjalë: futu në fushë dhe fillo të luash futboll.
Më pas mund të mendosh për Real Madrid. Pogba nuk e meriton të luajë me United në këto momente“, deklaron ish-mesfushori anglez. /abcnews.al
