Policia ka kapur në flagrancë një person teksa i shiste lëndë narkotike dikujt tjetër në Fier.
Operacioni antidrogë i koduar “Paketimi”, nga Seksioni për Hetimin e Narkotikëve në DVP Fier sekuestroi 865 gramë kanabis, një pjesë e së cilës ishte bërë gati për shitje në 114 doza. U arrestua në flagrancë poseduesi i lëndës narkotike, e u procedua penalisht shtetasi që dyshohet se do ta blinte.
Policia njofton se “në bazë të informacioneve të siguruara në rrugë operative, finalizuan operacionin antidrogë të koduar “Paketimi”, gjatë të cilit u bë kapja dhe arrestimi në flagrancë i shtetasit: K. C., 41 vjeç, banues në Lushnjë.
Si rezultat i operacionit, në lagjen “Kadri Qystri” Lushnjë, shërbimet e Policisë kapën në flagrancë shtetasin K. C., i cili do t’i shiste lëndën narkotike të bërë gati në doza, shtetasit T. Dh.
U procedua penalisht në gjendje të lirë shtetasi T. Dh., 53 vjeç, banues në Lushnjë, i cili dyshohet se do të blinte lëndën narkotike.
Gjatë kontrollit në banesën e shtetasit K. C, u gjet dhe sekuestrua sasia e lëndës narkotike 865 gram cannabis sativa, një pjesë e së cilës ishte e ndarë në 114 doza, gati për shitje.
Gjithashtu u sekuestruan në cilësinë e provës materiale një peshore elektronike që shërbente për të bërë gati në doza të vogla lëndën narkotike, një aparat celular dhe një sasi parash.
Materialet i kaluan Prokurorisë pranë Gjykatës së Shkallës së Parë Lushnjë, për veprat penale “Prodhimi dhe shitja e narkotikëve” dhe “Nxitja për përdorimin e drogës”.
