Shefi ekzekutiv i Milanit, Ivan Gazidis, ka deklaruar dhe një herë tjetër madhështinë që marka e kuqezinjve ka. Ai mbajti një fjalim në Samitin e Web-it ditën e djeshme, ku konfirmoi se “Djalli” është klubi i pestë më i ndjekur në botë dhe se tifozët meritojnë stadiumin më të mirë në botë.
“Pyetja themelore është marka dhe në këtë rast Milani është klubi i pestë më i ndjekur në botë. Marka jonë njihet kudo, por madhësia e biznesit tonë është shumë më e vogël në krahasim me katër e klubet që janë para nesh. Kjo përfaqëson për ne një mundësi të shkëlqyer për sa i përket një rritje të mundshme në të ardhmen”, deklaron Gazidis.
“Milani meriton stadiumin më të mirë në botë dhe ne do të përpiqemi që t’ua japim tifozëve atë që meritojnë. Është një projekt emocionues, ku sigurisht loja do të mbetet elementi kryesor. Projektet dixhitale nuk do të ndikojnë në këtë proces. Ne do të bëjmë gjithçka për të siguruar që Milani të ketë një pjesë të rëndësishme në dialogun me UEFA dhe FIFA, por dhe me Lega Serie A.
Kemi një ndikim të madh dhe fjala Milan vlen ende shumë. Forma e mirë që po kalojmë? Jam i sigurt që do të kemi sukses shumë shpejt. Jemi një ekip i ri që luan futboll të mirë. I kemi të gjithë kushtet për t’u rikthyer në majat e futbollit”, përfundon Gazidis. /abcnews.al
