Miralem Pjanic është ndër lojtarët më në formë të Juventusit. Ardhja e Sarrit i ka dhënë impulse të tjera lojës së boshnjakut.
Dy gola në dy ndeshjet e fundit dhe më shumë fantazi e kreativitet në fushën e blertë. Pjanic tregon ndryshimin midis Sarrit dhe Allegrit dhe nuk e fsheh ambicien për t’u përmirësuar e për t’u bërë ndër më të mirët në botë.
SARRI – “Sa më shumë ditë që kalojnë, aq më shumë kuptojmë se çfarë pret trajneri nga ne. Kemi pësuar ndryshime të mëdha, por skuadra është në rritje. Gjërat nuk mund të kthehen perfekte pas një muaji. Me kalimin e kohës do të dallohet edhe loja e Sarrit.”
ROLI – “Ndihem mirë dhe shokët më kërkojnë më shumë për të pasuar topin. Tentoj të bëj gjithmonë atë që më kërkon trajneri. Allegri më kërkonte të isha më pranë anësorëve të krahut, ndërsa tani fokusohem më shumë në vertikalizime, sepse para meje kam shumë lojtarë që dinë të lëvizin midis linjave. Kam më shumë liri dhe mundohem ta shfrytëzoj. Dua të rritem akoma dhe të bëhem një ndër më të mirët në botë.” /abcnews.al
