Juventusi ka reaguar pas humbjes 0-3 me Fiorentinën (22 dhjetor) dhe mbrëmjen e kaluar arriti fitoren e tretë radhazi në kampionat përballë Sassuolos. Bardhezinjtë fituan 3-1 në një takim që prodhoi gjithçka.
Trajneri Andrea Pirlo ndihet i lumtur për marrjen e tre pikëve, teksa “qan” dëmtimet e McKennie dhe Paulo Dybala. “Ishte e rëndësishme t’i jepnim vazhdimësi rezultateve tona pozitive. Duhet të fitonim dhe e bëmë me karakter dhe dëshirë.
Skuadra po rritet, tani kemi më shumë vetëbesim te cilësitë tona. Vuajtëm disi pas golit të Sassuolos, por ia dolëm të shënonim dy gola të tjerë në minutat e fundit. Kemi kampionë të mëdhenj në skuadër.
Juventusi ka presionin për të fituar të gjithë ndeshjet, por nuk është momenti të shohim renditjen. Pas disa muajsh duhet të shohim se ku kemi mbërritur“, deklaroi trajneri i kampionëve të Italisë. /abcnews.al
