Pesë gola kundër Novara, por Andrea Pirlo e di se garimi në Serie A dhe në Champions League kërkon shumë më shumë cilësi. Për këtë arsye ai pret që drejtuesit e klubi t’ia sjellin një sulmues. “Kam nevojë sa më shpejt për të, por merkato vazhdon dhe ka kohë për të punuar”, u shpreh trajneri i Juventusit pas miqësores.
Më pas ai komentoi ndeshjen: “Jam i kënaqur, ishte ndeshja e parë me të gjithë lojtarët e gatshëm. Djemtë janë shumë të përqendruar. Luajtëm me 3 dhe 4 mbrojtës, pasi po mundohemi të gjejmë zgjidhje të ndryshme gjatë lojës.
Në pjesën e parë mbrojtja ishte me 4, ndërsa në pjesën e dytë me 3 në bllok. Kemi ende dhe një javë për t’u përgatitur për rifillimin e kampionatit. Djemtë po mësohen me mënyrën e re të punës dhe do të kemi kohë të punojmë, pasi sezoni është i gjatë”.
Objektivat e bardhezinjve dihen dhe Pirlo deklaron: “Unë jam trajneri i Juventusit dhe të gjithë që vijnë këtu duhet të fitojnë. E di se duhet të fitoj, e njëjta gjë ishte dhe kur isha lojtar”. Sigurisht nuk mund të mos pyetet për Ronaldon: “Ai është mirë. E shfaqi dhe në kombëtaren diçka të tillë dhe është gati për të zhvilluar një sezon fantastik”. /abcnews.al
