Trajneri i Milanit, Stefano Pioli siguron se përballja me Juventusin në gjysmëfinalen e Kupës së Italisë, është testi më i mirë i mundshëm për të rikuperuar humbjen në derbi.
“Kupa e Italisë është e rëndësishme për të gjitha klubet prestigjioze, pasi të gjithë duan të bëjnë mirë në këtë turne. Ne kemi bërë mirë për të arritur në gjysmëfinale, por kjo nuk është e mjaftueshme. Duam të kalojmë të gjithë rrugën.
Ndeshja e parë do të jetë shumë e rëndësishme për të na dhënë një avantazh. Ne duhet të jemi të përqendruar, të mprehtë dhe me një performancë më të mirë teknike sesa me Interin.
Derbi? Ishte një humbje e rëndë, duke marrë parasysh mënyrën e krijimit dhe situatat që u krijuan në atë ndeshje. Na dëmtoi humbja në derbi, por menjëherë të luash një ndeshje shumë të rëndësishme kundër Juventusit mund të na ndihmojë të rikuperojmë.
Ne i kemi cilësinë për t’i shkaktuar probleme Juventusit dhe përballja me ta, është ndeshja më e mirë që mund të kërkonim pas derbit. Ne jemi kundër skuadrës më të mirë në Itali dhe një nga më të mirat në Evropë. Është një mundësi për të dëshmuar se jemi në nivelin e tyre”, përfundoi Pioli./abcnews.al
