Pinguinët afrikanë janë drejt rrugës së zhdukjes deri në vitin 2035 nëse nuk merren masa për të siguruar mbijetesën e tyre, thonë aktivistët.
Popullsia e pinguinëve afrikanë thuhet se ka rënë në mënyrë dramatike gjatë 100 viteve të fundit, raportoi Guardian. Mendohet se në fillim të shekullit të 20-të ka pasur ndoshta disa milionë çifte mbarështuese, ndërsa sot janë më pak se 11.000 dhe popullsia vazhdon të bjerë me shpejtësi.
Pinguinët afrikanë janë në “listën e kuqe” të specieve të rrezikuara të Bashkimit Ndërkombëtar për Ruajtjen e Natyrës. Shkencëtarët thonë se, sipas tendencave aktuale, deri në vitin 2035 nuk do të ketë çifte të mjaftueshme riprodhuese që speciet të vazhdojnë të mbijetojnë në natyrë.
Peshkimi i tepërt dhe ndryshimet mjedisore në Oqeanin Indian kanë çuar në një rënie të popullatave të peshqve, si sardelet, me të cilat ushqehen kryesisht pinguinët. Përveç kësaj, ato kërcënohen edhe nga sëmundjet, stuhitë, përmbytjet dhe ndotja.
Pinguinët afrikanë njihen për pamjen e tyre të pazakontë dhe zërin karakteristik. Ata banojnë kryesisht në ishujt në brigjet e Namibisë dhe Afrikës së Jugut, dhe në 1985 ata formuan një koloni në periferi të Simons Town në Cape Town./abcnews.al
