Përkeqësimi i krizës politike në Moldavi ka detyruar presidentin e ri të përkohshëm të shpallë zgjedhjet e parakohshme 4 muaj pas mbajtjes së tyre. Vendi, një ish-republikë sovietike, vazhdon të jetë politikisht i ndarë mes kampeve pro-BE-së dhe pro-rus.
Kriza politike në Moldavi është përshkallëzuar, me presidentin e përkohshëm që ka shpallur zgjedhjet e parakohshme më 6 shtator. Pavel Filip, që u caktua të dielën nga Gjykata Kushtetuese për të pasuar Igor Dodon, ka shpërndarë gjithashtu Parlamentin. Por Kuvendi e ka cilësuar lëvizjen e kreut të shtetit si ilegale, duke deklaruar se institucionet shtetërore të vendit janë marrë peng.
Ngërçi politik vjen pas zgjedhjeve të përgjithshme të mbajtura në shkurt, kur mes kandidatëve pro-BE-së dhe atyre pro-rusë nuk doli një fitues i qartë. Tani ekziston frika se kriza e zgjatur politike mund të çojë në përleshje të dhunshme në rrugët e vendit. Moldavia, një ish-republikë sovietike, shtrihet mes BE-së dhe Ukrainës dhe është një nga vendet më të varfëra të Europës.
Në republikën parlamentare, kampet politike rivale shpesh herë përplasen me njëra-tjetrën. Për këtë arsye Moldavia, ku elektorati është i ndarë mes BE-së dhe Rusisë, është bërë arenë e përplasjeve të tilla në vitet e fundit. Të shumta janë dhe rastet kur vendi shkon në zgjedhje të parakohshme, por rezultatet nuk janë kurrë përfundimtare. /ABC News Albania 24/7
