Fermerët e Divjakës këto ditë janë të zënë. Eshtë momenti kur puna e tyre e gjithë vitit jep frytet. Ka filluar mbledhja e zhardhokëve të patateve. Prodhimi i tyre është cilësor dhe bio, por tregu ku i shesin kufizohet në Shqipëri dhe pak edhe ne Kosovë. Jashtë kufijve kombëtare, veprojnë rregulla të tjera certifikimi dhe kjo ka dëmtuar tregtinë e tyre.
Fermerët thonë se eksporti është zgjidhja e problemit të tyre të përsëritur çdo vit me shitjen.
“Eksporti na jep shume dorë sepse shkulet shumë, shkurton edhe ditët e punës…se do fillojmë dhe me shalqinin që është gati tani. Po pati eksport ka gjëra të favorshme per Divjaken dhe për të gjithë ata që merren me bujqësi.”
” Këtë vit kemi rreth 12 dynym, por kemi rendiment shumë të ulët. Në prill pati shumë luhatje temperaturash.”
Në vitin 2021, u prodhuan 258.862 tonë patate, duke u rritur me 1,56 %, në krahasim me vitin 2020. Qarqet që prodhojnë më shumë patate janë Fieri, Korça dhe Elbasani.
Eksportin e patates shqiptare në vendet e Bashkimit Europian deri më sot e ka penguar mungesa e certifikimit të saj. Patatja shqiptare është cilësuar si e pasigurt përsa i përket sigurisë ushqimore. Por analizat e kryera së fundmi kanë vërtetuar të kundërtën.
Patatja e hershme e prodhuar mga fermerët e zonës së Divjakës, nga analizat e kryera në laboratorin për mbrojtjen e bimës në universitetin Bujqësor të Tiranës rezulton të jetë e pastër nga sëmundjet bakteriale dhe mykogjenore, duke plotësuar kështu një nga kushtet kryesore për eksport jashtë vendit.
Por, që patatja të dalë jashtë vendit, BE kërkon kontroll të vazhduesheshëm në të gjithë territorin ku prodhohet ky produkt.
“BE kërkon që të kryehet monitorimi i vazhdueshëm dhe të dalë produkti i pastër.”
Universiteti Bujqësor shpreh gatishmërinë për të bashkëpunuar me ministrinë e Bujqësisë, për ta çuar pataten jashtë kufijve.
“Tashmë jemi në një bashëkëpunim me ministrinë e Bujqësisë, për të pasur një plan kombëtar monitorimi. Pasi të perfundohet ky plan të themi që jemi të pastër në të gjithë vendin.”
