Kryeministri i Spanjës, Pedro Sanchez ka shprehur mbështetjen që Bosnja të bëhet një kandidate për anëtarësim në Bashkimin Evropian mes frikës se pasiguria e shkaktuar nga lufta në Ukrainë mund të nxisë paqëndrueshmëri në kombin ballkanik të copëtuar etnikisht që kaloi një konflikt shkatërrues në vitet 1990.
Sanchez shkoi në Sarajevë nga Serbia, ku nisi të premten turneun e tij në rajonin e Ballkanit. Sanchez do të udhëtojë gjithashtu në Mal të Zi, Maqedoninë e Veriut dhe Shqipëri.
“Gjatë takimeve të mia sot doja të nënvizoja mundësinë që do të ishte për Bosnjë dhe Hercegovinën nëse Bashkimi Evropian do ta merrte zgjerimin e tij me një ndjenjë të re urgjence”, tha Sanchez në një konferencë për shtyp.
Pedro Sanchez shprehu mbështetjen edhe për Serbinë, teksa ndodhej në një vizitë zyrtare në Beograd.
Lexo edhe: Kryeministri spanjoll në Beograd: Mbështesim Serbinë kur bëhet fjalë për Kosovën
Ai siguroi presidentin serb, Aleksandër Vuçiç se Spanja e mbështet Serbinë kur bëhet fjalë për Kosovën.
“Ne mbështesim Serbinë kur është fjala për Kosovën. Spanja ishte dhe do të jetë gjithmonë me Serbinë në mbrojtje të këtij parimi”, ka thënë Sanchez në një konferencë të përbashkët me Vuçiç. /abcnews.al
