Kuba ka hequr përkohësisht detyrimet doganore për importin e ushqimeve, ilaçeve dhe sendeve të tjera të domosdoshme pas trazirave që kanë përfshirë vendin. Që nga e hëna e ardhshme deri në fund të vitit, nuk do të ketë asnjë kufizim për mallrat.
Mijëra dolën në rrugë të dielën duke protestuar për mungesën e ushqimeve dhe ilaçeve, rritjen e çmimeve dhe menaxhimin e Covid-19 nga qeveria. Dhjetëra janë arrestuar në të gjithë vendin që nga fillimi i trazirave të dielën. Autoritetet konfirmuan të martën se një 36 vjeçar ka humbur jetën nga trazirat.
Demonstratat e paautorizuara janë të paligjshme në vend, dhe protestat anti-qeveritare janë të rralla. Për shkak të trazirave të shumta, kryeministri Manuel Marrero Cruz njoftoi vendimin të mërkurën.
Aktualisht udhëtarët në Kubë mund të sjellin deri në 10 kg ilaçe pa taksa. Sidoqoftë, ata duhet të paguajnë detyrime doganore për sasinë e kufizuar të ushqimeve dhe furnizimeve të higjienës personale.
Protestat anti-qeveritare filluan të dielën me një demonstratë në qytetin e San Antonio de los Banos, në jug-perëndim të Havana, por u përhapën shpejt në të gjithë vendin. Shumë prej tyre u transmetuan drejtpërdrejt në rrjetet sociale. Në videot e postuara shihen njerëz që përmbysnin makinat e policisë dhe plaçkitnin disa dyqane në pronësi të shtetit.
Për shumë kubanë, këto dyqane janë mënyra e vetme ku mund të blejnë gjërat e domosdoshme, por çmimet janë të larta. Turizmi, një nga sektorët më të rëndësishëm, është prekur për shkak të kufizimeve të udhëtimeve gjatë pandemisë.
Kuba ka fajësuar SHBA-në dhe sanksionet e saj ekonomike për protestat dhe problemet më të gjera të Kubës. Të mërkurën SHBA-ja bëri thirrje për lirimin e të gjithë protestuesve të arrestuar në Kubë gjatë trazirave të fundit./abcnews.al
