Departamenti Amerikan i Shtetit po përballet me një padi të re të ngritur nga palestinezët dhe palestinezo-amerikanët, duke e akuzuar për anashkalimin e ligjit të të drejtave të njeriut në SHBA prej dekadash, duke vazhduar financimin e njësive ushtarake izraelite të akuzuara për mizori në territoret palestineze.
Padia e ngritur të martën në gjykatën e qarkut të Uashington DC shënon herën e parë që viktimat e shkeljeve të dyshuara të të drejtave të njeriut po sfidojnë DASH.
Paditësit përfshijnë Amal Gaza, një pseudonim për një mësuese matematike nga Gaza, e cila ka humbur 20 anëtarë të familjes; Shaëan Jabarin, drejtori i grupit palestinez të të drejtave të njeriut Al-Haq, i cili duroi gjashtë vjet burgim arbitrar në Bregun Perëndimor; dhe Ahmed Moor, një palestinez amerikan me të afërm në Gaza, të cilët janë zhvendosur vazhdimisht nga ofensiva e vazhdueshme izraelite. Ata kërkojnë ndërhyrje gjyqësore për të detyruar SHBA-në të respektojë ligjin.
Me numrin e të vdekurve në Gaza që nga tetori i kaluar që raportohet se i afrohet 45,000 dhe ndihma humanitare për territorin e kufizuar, sfida ligjore përfaqëson një përpjekje për të detyruar administratën amerikane të zbatojë një ligj që është parë si efektiv në ndihmën e SHBA-së për të frenuar shkeljet e të drejtave të njeriut nga njësitë ushtarake të huaja në Amerikën qendrore, Kolumbi, Nepal dhe vende të tjera.
Ligji Leahy u hartua për çdo forcë sigurie që SHBA-ja i identifikon si të papërshtatshme për shkak të një shkeljeje të rëndë të të drejtave të njeriut. Por, një zyrtar tha për The Guardian se “Rregullat ishin të ndryshme për Izraelin.”
Ankesa thekson një sërë shkeljesh të supozuara të kryera nga njësitë ushtarake izraelite me mbështetjen e SHBA-së, duke përfshirë torturën, ndalimin e zgjatur pa akuzë, zhdukjen dhe ato që paditësit i përshkruajnë si veprime që përbëjnë gjenocid në Gaza./abcnews.al
