Kryeministri hungarez, Viktor Orban deklaroi të dielën se Donald Trump ka premtuar se nuk do t’i japë para Ukrainës nëse rizgjidhet sërish president dhe se Evropa nuk do të jetë në gjendje ta financojë pa SHBA-në.
“Është e qartë se Ukraina nuk po qëndron në këmbët e veta. Nëse amerikanët nuk japin para, evropianët nuk do të mund ta financojnë këtë luftë dhe do të përfundojë. Trump nuk është president tani, por partia e tij po i pengon demokratët të dërgojnë para në luftë. Ai tha se nëse kthehet, nuk do ta bëjë, nuk do të japë asnjë cent dhe pastaj lufta do të përfundojë”, tha Orban.
Kryeministri hungarez shtoi se Trump ka plane shumë të detajuara për t’i dhënë fund luftës por nuk dha detaje. Zyra e shtypit të ish presidentit amerikan deklaroi se Trump dhe Orban “diskutuan një gamë të gjerë çështjesh në lidhje me Hungarinë dhe Shtetet e Bashkuara, duke përfshirë rëndësinë e kufijve të fortë dhe të sigurt për secilin vend”./abcnews.al
