Opozita parlamentare sjell një propozim të ri për Reformën Zgjedhore. Nimet Musai, kreu i grupit të deputetëve të pavarur të ardhur nga listat e LSI, kërkon hapjen e listave dhe përjashtimin e koalicioneve para zgjedhore.
“Aktorë të ndryshëm politikë, zëra publikë dhe politik, këto kohë kanë sjellë në tryezën e reformës zgjedhore një propozim të ri: kalimin drejt një sistemi zgjedhor me lista të hapura.
Duke marrë këtu shkas edhe nga modeli zgjedhor i Kosovës, listat e hapura të shoqërohen edhe me përjashtimin e koalicioneve parazgjedhore. Këtë propozim, do t’ia përcjell edhe tryezës së reformës, sapo sistemi të jetë pjesë e tyre”,-tha Nimet Musai.
Kjo ide është artikuluar edhe më herët nga Damian Gjiknuri si një skemë që socialistët mund ta preferonin.
Gjithashtu, Musai tha se opozita parlamentare mbështet depolitizimin e administratës zgjedhore.
“Zotohem, e për këtë kam edhe pëlqimin dhe gatishmërinë e grupit parlamentar demokrat, se do të mbështesim me të gjitha mjetet idenë e depolitizimit të administratës zgjedhore. Shqipëria i ka të gjitha resurset njerëzore për ta mundësuar, Perëndimi i ka të gjitha modelet fikse për t’u përvetësuar, Ajo çfarë duhet është vetëm vullneti politik që, Trupa e administrimit zgjedhor, Një here e mire, Një here e përgjithnjë të depolitizohet”,-tha Nimet Musai./abcnews.al
