Operatorët turistikë në Vlorë i janë drejtuar me një kërkesë kryeministrit Edi Rama lidhur me problemet e hasura në këtë sezon veror nën ndikimin e pandemisë së koronavirusit.
Ata thonë se përveç pandemisë, ashtu si çdo sezon tjetër janë problem edhe mungesa e stafit të kualifikuar të punës dhe për këtë arsye kërkojnë krijimin e kushteve të përshtatshme për rekrutimin e punonjësve të huaj të trajnuar dhe kualifikuar!
Në kërkesë, ata theksojnë se nëse nuk zgjidhet ky problem e kanë të pamundur të ngenë në standardet e duhura shërbimin e turistët.
Kërkesa e plotë: Pavarësisht situatës së Coronavirusit ky sezon turistik tregoi sërish problemet me të cilat përballet sektorin turistik! Mes tyre edhe mungesa e tregut të kualifikuar të punës. Ndaj, ne operatorët turistik kërkojmë krijimin e kushteve të përshtatshme për rektrutimin e punonjësve të huaj të trajnuar dhe kualifikuar!
Edhe pse ka kaluar pjesa e pikut te sezonit turistik ende një pjesë e konsiderueshme e jona është duke kërkuar staf për të përmbushur nevojat. Pavarësisht bashkëpunimit tonë me zyrat rajonale të punësimit oferta është më e ulët se kërkesa ndaj do të ishte e udhës lehtësimi i procedurave për punësimin e shtetasve të huaj nga vende të rajonit dhe jo vetëm.
Nëse nuk zgjidhet ky ngërç për ne është e pamundur të ngremë në standardet e duhura shërbimin./m.v. abcnews.al
