Kombet e Bashkuara thonë se vetëm një spital në Gazën veriore është funksional ndërsa ushtria izraelite vazhdon të godasë zona afër dhe objekte mjekësore, duke vështirësuar punën e punonjësve shëndetësorë.
“Të gjithë, përveç njërit prej spitaleve në qytetin e Gazës dhe Gazën veriore, thuhet se janë jashtë shërbimit, që nga 13 nëntori, për shkak të mungesës së energjisë, materialeve mjekësore, oksigjenit, ushqimit dhe ujit, të shoqëruara nga bombardimet dhe luftimet në afërsi të tyre.” tha të martën Zyra e OKB-së për Koordinimin e Çështjeve Humanitare (OCHA).
Nga afërsisht 30 spitale dhe klinika në veri të Gazës, vetëm një strukturë mjekësore thuhet se mund të pranojë pacientë, sipas OKB-së. Të paktën 500 pacientë po përpiqen të strehohen në Spitalin Baptist Al-Ahli, në qytetin e Gazës.
Së fundmi, presidenti amerikan Joe Biden ka shprehur shqetësimin për spitalet në Gaza mes akuzave izraelite se Hamasi po i përdor ato për të koordinuar sulmet.
Këshilltari i Sigurisë Kombëtare, Jake Sullivan, i bëri jehonë komentit të Bidenit të hënën, duke thënë: “Ne nuk duam të shohim përleshje me zjarr në spitale. Ne duam t’i shohim pacientët të mbrojtur,” tha Sullivan. “Ne duam t’i shohim spitalet të mbrojtura. Ne kemi folur me qeverinë izraelite për këtë dhe ata kanë thënë se ndajnë atë pikëpamje se nuk duan të shohin zjarrfikje në spitale.”
