Këshilli i Sigurimit i Kombeve të Bashkuara do të votojë të hënën për një rezolutë që bën thirrje për një armëpushim të menjëhershëm humanitar në Gaza gjatë muajit të shenjtë mysliman të Ramazanit.
Votimi vjen pasi Rusia dhe Kina të premten vendosën veton ndaj një rezolute nga SHBA-ja që mbështeste “një armëpushim të menjëhershëm dhe të qëndrueshëm” në konfliktin midis Izraelit dhe Hamasit.
Shtetet e Bashkuara kanë paralajmëruar se rezoluta që do të votohet të hënën në mëngjes mund të dëmtojë negociatat për ndalimin e armiqësive midis Shteteve të Bashkuara, Egjiptit dhe Katarit, duke rritur mundësinë e një vetoje tjetër, këtë herë nga amerikanët.
Rezoluta, e paraqitur nga 10 anëtarët e zgjedhur të këshillit, mbështetet nga Rusia dhe Kina dhe Grupi Arab i Kombeve të Bashkuara prej 22 vendesh.
Në një deklaratë të lëshuar të premten, Grupi Arab u bëri thirrje të 15 anëtarëve të këshillit “të veprojnë me unitet dhe urgjencë” dhe të votojnë për rezolutën “për të ndalur gjakderdhjen, për të ruajtur jetët dhe për të shmangur vuajtjet dhe shkatërrimet e mëtejshme njerëzore”./abcnews.al
