Kombet e Bashkuara, kanë bërë një hetim në lidhje me pasojat e luftës në Idlib të Sirisë ku janë kryer krime të luftës dhe krime të mundshme kundër njerëzimit.
Komisioni i Pavarur Ndërkombëtar mbi Sirinë tha se krimet kanë ndodhur gjatë fushatës së nisur në fund të vitit 2019 nga forcat pro-regjimit sirian, për të rimarrë zonat e fundit të mbetura në vend të mbajtura nga grupet rebele të armatosura.
“Forcat e qeverisë siriane dhe aleatët e tyre rusë kanë bombarduar civilët në provincën Idlib pa dallim, ndërsa rebelët torturuan dhe ekzekutuan civilët, akte që korrespondojnë me krime lufte nga të dyja palët. Fëmijët u granatuan në shkollë, prindërit në treg, pacientët në spitale dhe familjet e tëra u bombarduan edhe kur iknin”, tha kryetari i komisionit, Paulo Pinheiro.
Regjimi i presidentit sirian Bashar al-Asad, i mbështetur nga Rusia, në dhjetor të vitit 2019, filloi sulmin në rajonin veriperëndimor.
Një armëpushim i brishtë i ndërmjetësuar nga Rusia dhe Turqia – e cila mbështet forcat rebele, hyri në fuqi në fillim të marsit.
Ofensiva shkaktoi zhvendosjen e një milionë njerëzve dhe më shumë se 500 civilë kanë vdekur, thotë hetimi i Kombeve të Bashkuara./abcnews.al
