Më shumë se gjysmë milioni njerëz në Gaza, një e katërta e popullsisë, vuajnë nga uria, sipas një raporti të enjten nga Kombet e Bashkuara dhe agjencitë e tjera, duke theksuar krizën humanitare të shkaktuar nga bombardimet dhe rrethimi i enklavës nga Izraeli si kundërpërgjigje ndaj sulmit të Hamasit me 7 Tetor.
Raporti i publikuar të enjten nga 23 agjenci të OKB-së dhe joqeveritare zbuloi se e gjithë popullsia në Gaza është në krizë ushqimore, me 576,600 njerëz që janë në nivele katastrofike. “Është një situatë ku pothuajse të gjithë në Gaza janë të uritur,” tha Arif Husain, ekonomist i Programit Botëror të Ushqimit.
Izraeli është zotuar të vazhdojë ofensivën derisa të shkatërrojë aftësitë ushtarake të Hamasit dhe të kthejë shumë pengje të kapur nga militantët palestinezë gjatë sulmit të tyre të 7 tetorit. Hamasi dhe militantë të tjerë vranë rreth 1200 njerëz atë ditë, kryesisht civilë, dhe morën peng rreth 240 të tjerë.
Shtetet e Bashkuara kanë vazhduar të mbështesin operacionin ushtarak të Izraelit, duke kërkuar gjithashtu përpjekje më të mëdha për të mbrojtur civilët. SHBA-të duan që Izraeli të kalojë në operacione që synojnë liderët e Hamasit dhe rrjetin e tuneleve të grupit, duke shmangur kështu civilët./abcnews.al
