Qetësia është një nga cilësitë më të mira të Zinedine Zidane, por, njësoj si të gjithë, edhe trajneri i Real Madrid ka momente kur shpërthen. Sidomos kur lojtarët transmetojnë në media bisedat “sekrete”. Mediat spanjolle raportuan se francezi bëri një mbledhje virtuale disa ditë më parë me të gjithë lojtarët e tij.
Objektivi ishte për të marrë vesh gjendjen e tyre dhe për t’u rritur moralin e vetbesimin, aq të nevojshme në këto ditë të vështira. Një sportist vuan edhe më shumë se të tjerët izolimin, Zidane e ka të qartë pasi ka luajtur futboll. Një gjest i bukur që duhet të kishte mbetur sekret, por dikush e ka ndarë me miqtë gazetarë.
El Chiringuito raporton se kjo gjë e ka tërbuar trajnerin e “Los Blancos”. Ai nuk e beson se si është e mundur që gjithçka ndodh brenda skuadrës del në media. Zidane është zemëruar me të gjithë lojtarët e tij, të cilët duhet të mësohen ta mbajnë gojën mbyllur, sidomos me gazetat dhe portalet e ndryshme. /abcnews.al
