Vendimi i Ministrisë së Infrastrukturës dhe Energjisë për të ngrirë në grup dhe në mënyrë të njëanshme të gjitha kontratat koncesionare jo operative, sipas Konfindustrisë nuk i jep zgjidhje problematikave. Konfindustria nëpërmjet një njoftimi për shtyp thekson se ngrirja e kontratave për HEC-et, mund të prodhojë pasoja të rënda financiare për biznesin, buxhetin e shtetit, korrupsion si dhe rritje të pasigurisë së investitorëve.
Konfindustria më tej thotë se Ministria e Infrastrukturës dhe Energjisë duhet të sqaroje sa më shpejt, se cfarë përfshin koncepti ligjor i kontratave “jo operative” dhe cfarë do ndodhë me operatorët e tjerë të ndërtimit të HEC-eve.
Ka pasur mjaft raste të ngjashme të ndëshkimeve të rënda financiare prej dhjetra milion euro ndaj shtetit shqiptar në arbitrazhe ndërkombëtare si CEZ, projekti i trenit Durrës-Tiranë që flasin qartë për rrezikun, deklaron Konfindustria.
Në njoftimin për shtyp të Konfindustrisë thuhet se në rast të shkeljeve ligjore të kontratave, Ministria e Infrastrukturës dhe Energjisë të ndjekë procedurat përkatëse për të zgjidhur në rrugë gjyqësore mosmarrëvëshjet me secilin biznes koncesionar në mënyrë individuale e jo në grup./abcnews.al
