62 vjeçari Yevgeny Prigozhin, i lindur në Leningrad, ose Shën Petërburg i sotëm bëri një udhëtim jete të jashtëzakonshëm që e çoi atë nga i burgosur në shitësin e hot-dogëve në restorant elegant dhe më pas nga luftërat propagandistike në fushat e frikshme të betejës në Ukrainë.
Fëmijë dhe adoleshent ishte i familjarizuar me burgun pas vjedhjeve që kryente. Në vitin 1990, pasi kreu dënimin e tij, nis punën si shitës ambulant hotdogësh. Shumë shpejt ai arriti të hapë një zinxhir restorantesh, kompani shërbimi kateringu të quajtur Konkord si dhe kazino.
Po në atë vit, ai u njoh me presidentin rus, Vladimir Putin, që asokohë ai punonte në Bashkinë e Shën Pjetërburgut. Pronari i një restoranti të nivelit të lartë, ai fitoi sipërmarrjet e hotelierisë në Kremlin që i dhanë pseudonimin “kuzhinieri i Putinit”, por ai njihej kryesisht vetëm në qarqet e rralla të elitës.
Duke përfituar nga njohja e elitave dhe sidomos kur Putin u bë president i Rusisë, Prigozhin u pasurua, duke fituar kontrata fitimprurëse hotelerie dhe ndërtimi me qeverinë ruse.
Bizneset e tij të hotelierisë u zgjeruan ndjeshëm dhe në vitin 2010, Putin ndihmoi në hapjen e fabrikës së Prigozhin, e cila u ndërtua me kredi bujare nga një bankë shtetërore. Vetëm në Moskë, kompania e tij Concord fitoi miliona dollarë në kontrata për të ofruar ushqime për shkollat publike.
Përmes lidhjeve të forta, në vitin 2014 Prigozhin ndërtoi një forcë mercenare të njohur si “Wagner”. Po atë vit nisi edhe aneksimi i Krimesë nga Rusia. Nuk dihet shumë për formimin e Grupit Wagner teksa roli i Prigozhin u mbajt një sekret shtetëror për shumë vite.
Fillimisht Wagner kishte rreth 5 mijë efektive, kryesisht ish-ushtarak profesionist. Numrat e tyre u rritën në mënyrë të ndjeshme gjatë luftës në Ukrainë duke shkuar deri në 50 mijë anëtarë. Mercenarët e grupit të tij Wagner hynë në luftën e Rusisë në Ukrainë në vitin 2022, duke u bërë famëkeq për luftimet e tyre gjakatare.
Mercenarët e Wagnerit kanë luajtur rol kyç në Mariupol dhe më pas në Bakhmut, një qytet kryesor për transportin në rajonin e Donjeckut. Ky ka qenë vendi i luftimeve më të zjarrta që zgjati disa muaj duke shkaktuar numër të madh të viktimave nga të dyja palët.
Por kreu i Wagner Prigozhin ndryshoi qasjen ndaj menaxhimit të luftës në Ukrainë. Ai filloi të akuzonte udhëheqjen ushtarake të Rusisë, duke e fajësuar atë për dështimin për të siguruar municion të mjaftueshëm për forcat e tij.
Më 23 qershor, forcat e tij u larguan nga Ukraina dhe kapën selinë ushtarake në qytetin jugor rus të Rostov-on-Don. Ai i urdhëroi ata të niseshin drejt Moskës, duke thënë se “nuk ishte një grusht shteti ushtarak, por një marshim drejtësie” për të rrëzuar ministrin e mbrojtjes Shoigu.
Por Prigozhin e anuloi veprimin më pak se 24 orë më vonë pas një marrëveshje të arritur me presidentin e Bjellorusisë Alexander Lukashenko. Aleati më i ngushtë i Putin i garantoi kreut të Wagner, Prigozhin, siguri në vendin e tij, ndërsa ky i fundit do të tërhiqte forcat.
Në një fjalim televiziv, Putin ishte zotuar të ndëshkonte ata që qëndronin pas kryengritjes së armatosur të udhëhequr nga mbrojtësi i tij i dikurshëm. Ai e quajti rebelimin një “tradhti” .
Fillimisht u raportua se kreu i Wagner ishte në Bjellorusi. Mirëpo vetëm para disa ditësh ai u shfaq në një video 40 sekonda qe u tha se ishte në Afrikë.
“Ne po punojmë edhe pse është 50 gradë, ashtu na pëlqen ne”, ishin fjalët e fundit të shefit të Jevgeni Prigozhin nga Afrika./abcnews.al
