Drejtuesit e disa prej kompanive më të mëdha të telekomunikacionit dhe teknologjisë njoftuan se 6G, gjenerata e ardhshme e internetit celulare, ka të ngjarë të dalë në vitin 2030.
Megjithatë, ata paralajmëruan se industria nuk duhet të krijojë shumë publicitet rreth teknologjisë në një përpjekje për të parandaluar konfuzionin dhe teoritë konspirative midis publikut.
Zhvillimi vjen ndërsa kompanitë përpunojnë mënyra për të rikuperuar miliarda në investimet 5G gjatë viteve të fundit.
“Nuk kemi mbaruar ende me zhvillimin e 5G. Nuk mendoj se është koha e duhur për të folur seriozisht për 6G. Është shumë herët”, tha Ha Min-yong, kreu i zhvillimit në SK Telecom, javën e kaluar.
6G dominoi Kongresin Botëror të Celularëve të javës së kaluar në Barcelonë, ekspozitën më të madhe tregtare në botë për industrinë celulare, me kompanitë ndërkombëtare të telekomunikacionit që parashtrojnë synimet e tyre për teknologjinë e re.
Përdorimi i 5G është i ulët
Operatorët celularë në Kinë, Korenë e Jugut dhe Shtetet e Bashkuara filluan të përdorin 5G në vitin 2019, duke paralajmëruar lidhje pafundësisht më të shpejta dhe më të besueshme se brezi i mëparshëm i internetit celular, 4G.
Megjithatë, depërtimi i kësaj teknologjie ishte i ulët tek konsumatorët. Vetëm një në pesë qytetarë në botë sot përdor një telefon celular 5G, sipas Strategy Analytics.
Nga ana tjetër, 5G u zhvillua nga industria e telekomunikacionit jo vetëm si një produkt për konsumatorët që dëshironin lidhje më të shpejta, por edhe si një rrjet që do të mbështeste teknologjitë e reja si makinat pa shofer apo taksitë ajrore pa pilot.
Por pas një investimi marramendës prej qindra miliarda dollarësh në rrjetet 5G, investitorët nuk kanë parë shumë përfitime. Sipas analistëve, kthimi mund të jetë çështje kohe.
“Përshtatja e 5G po përshpejtohet në shumicën e vendeve ku teknologjia është zhvilluar, por kërkesa midis konsumatorëve është e ulët,” tha Richard Webb, drejtor i infrastrukturës së rrjetit në CCS Insight.
Pra, pse të flasim për 6G?
Rrjetet e telekomunikacionit kërkojnë specifika. Këto janë rregulla teknike të pranuara ndërkombëtarisht që përcaktojnë se si funksionon një teknologji dhe ndërveprueshmëria e saj në mbarë botën. Ndërveprueshmëria ka të bëjë me aftësinë e dy ose më shumë sistemeve për të punuar së bashku dhe për të shkëmbyer të dhëna.
Këto standarde kërkojnë shumë vite për t’u zhvilluar dhe finalizuar, duke përfshirë një numër të madh aktorësh, nga kompanitë tek akademia dhe industria. Kjo është arsyeja pse industria e shikon atë kaq tërësisht.
Puna për specifikimet e teknologjisë 6G tashmë është duke u zhvilluar, megjithëse është në një fazë të hershme.
“Ajo që unë do të thoja është se ne si industri duhet të ndalojmë së ngatërruari konsumatorët duke folur për G sepse gjëja tjetër që ata do të fillojnë të pyesin është se kur do të vijë 6G,” tha Howard Watson, shefi i teknologjisë në BT.
