Conor McGregor u rikthye në mënyrën më të mirë të mundshme në UFC, duke mposhtur në vetëm 40 sekonda Donald “Cowboy” Cerrone. Luftëtari irlandez ishte i pamëshirshëm dhe me goditje njëra pas tjetrës, shkatërroi 36 vjeçarin amerikan.
McGregor u shpall fitues pas vetëm 40 sekondash me TKO, duke treguar të gjithë arsenalin e tij të goditjeve. Pas kësaj fitoreje, ylli irlandez i UFC-së u pyet për ndeshjen e radhës, por refuzoi të japë emra konkretë, duke përmendur një listë me disa alternativa.
Sherri me Khabib Nurmagomedov nuk është lënë pas dhe McGregor po pret me padurim një ndeshje të dytë me kampionin nga Dagestani. Por një emër që e tërheq, është ai i Jorge Masvidal. Ky i fundit ka marrë një famë të madhe vitet e fundit dhe McGregor është pro një ndeshje me të. Këtë gjë e ka konfirmuar edhe presidenti i UFC-së, Dana White, i cili do të dëshironte të shihte McGregorin të ndeshej me Masvidal, ndoshta në mes të vitit 2020./abcnews.al
