Dikur një makth për administratorët e sistemit kompjuterik të qeverisë amerikane, më vonë një ekspert i respektuar i sigurisë kibernetike, ai vdiq pas një beteje të gjatë me kancerin pankreatik në moshën 59-vjeçare.
Kevin Mitnick ishte një nga hakerët e parë që ra në konflikt me ligjin. Ai ka lindur më 6 gusht 1963 në Van Nuys, një periferi të Los Anxhelosit dhe që në moshë të vogël ka treguar interes të madh për teknologjinë dhe kompjuterët dhe ka qenë një nga hakerët e parë që ka fituar famë ndërkombëtare.
Ai u arrestua në vitin 1995 pas një gjuetie dyvjeçare nga FBI. Autoritetet federale të Shteteve të Bashkuara të Amerikës e kanë akuzuar atë për një sërë aktivitetesh hakerimi, duke përfshirë aksesin e paligjshëm në rrjetet ushtarake dhe të korporatave.
Ndër të tjera, Mitnik akuzohej se kishte vjedhur të dhëna sekrete nga kompjuterët e një numri të madh kompanish, duke u shkaktuar atyre dëme të mëdha materiale. Ai u dënua me pesë vjet burg. Edhe pse fillimisht ai mohoi gjithçka, ai përfundimisht u deklarua fajtor për shtatë akuza. Për tetë vjet, atij iu ndalua përdorimi i kompjuterit, celularit apo çdo pajisjeje që mund të lidhet me internetin.
Kur masa u hoq në vitin 2003, ai themeloi firmën e konsulencës për sigurinë kibernetike “Mitnick Security Consulting”, duke vënë në anën ligjore aftësitë e tij të hakerimit në kompjuter. Ai ishte një ekspert i njohur i sigurisë kibernetike dhe autor i disa librave mbi hakimin dhe sigurinë kompjuterike.
Ai u dëgjua për herë të parë në vitin 1979, kur ai “hakoi” sistemin e Korporatës së Pajisjeve Dixhitale (DEK) duke telefonuar administratorin dhe duke e bindur se ishte një nga menaxherët të cilit sistemi nuk i lejonte akses. Administratori menjëherë krijoi një llogari për të dhe i dha atij një fjalëkalim që Mitnick ndau me kolegët e tij hakerë të cilët e sfiduan atë të hynte në DEK. Ai u akuzua me 160,000 dollarë dëmshpërblim.
Kevin Mitnick citohet shpesh për hakerimin dhe sigurinë. Një nga deklaratat e tij më të famshme thotë:
“Vetëm sepse nuk mund të shohësh diçka, nuk do të thotë se nuk mund të të vrasë.”
Kjo deklaratë zakonisht interpretohet si një paralajmërim për kërcënimet e fshehura në botën e sigurisë kibernetike, ku sulmet më të rrezikshme vijnë nga këndvështrime dhe burime të papritura që duken të padëmshme në shikim të parë.
Ai vdiq nga kanceri i pankreasit, me të cilin po luftonte për 14 muajt e fundit./abcnews.al
