Loading ...
Përshkallëzimi i konfliktit në Lindjen e Mesme ka bërë që nafta të regjistrojë çmime rekord duke tejkaluar 100 dollarë për fuçi. Ky çmim rezulton të jetë më i larti i regjistruar në katër vitet e fundit ndërsa hera e parë që kaloi këtë shifër ishte në kohën e pushtimit të Ukrainës nga Rusia në vitin 2022.
Menjëherë pasi çmimi i naftës kaloi mbi 100 dollarë në hapjen e bursës ka reaguar edhe Presidenti Donald Trump i cili postoi në Truth Social se një rritje në “çmimet afatshkurtra të naftës” ishte një “çmim shumë i vogël për t’u paguar” për shkatërrimin e kërcënimit bërthamor të Iranit.
Nisur nga kjo vendet e G7 do të mbajnë një takim urgjent për të diskutuar rritjen e çmimeve të naftës, dhe tregjet e aksioneve ranë për shkak të përshkallëzimit të luftës SHBA-Izrael me Iranin.
Ministrat e financave nga vendet kryesore të industrializuara, përfshirë kancelaren e Mbretërisë së Bashkuar Rachel Reeves, do të mblidhen për të diskutuar ndikimin ekonomik të konfliktit.
Financial Times raportoi se takimi i G7 do të diskutojë një lirim të përbashkët të naftës nga rezervat, të koordinuar nga Agjencia Ndërkombëtare e Energjisë. Sipas raportimeve, disa vende anëtare kanë mbështetur një skenar për lirimin e 300 deri në 400 milionë fuçive naftë nga rezervat emergjente nëse situata përkeqësohet.
Edhe Çmimet e kontratave të ardhshme të naftës dhe benzinës janë rritur ndjeshëm, ndërsa tregtarët shqetësohen se lufta në Iran do të çojë në kufizime të zgjatura në rrjedhën e naftës në të gjithë globin – veçanërisht pasi lufta është përhapur në vende të tjera në Lindjen e Mesme, duke përfshirë sulme ndaj rafinerive të afërta në rajonin e pasur me naftë.
Ndërprerjet e mëdha në furnizimin me energji nga rajoni kërcënojnë të rrisin çmimet për konsumatorët dhe bizneset në të gjithë botën.
Rreth një e pesta e furnizimit botëror me naftë zakonisht transportohet përmes Ngushticës së Hormuzit. Por trafiku përmes këtij kalimi të ngushtë është ndalur pothuajse që kur filloi lufta më shumë se një javë më parë.
