Tottenham ka lënë pas krahëve momentin e vështirë dhe është rikthyer te fitoret. Djemtë e Jose Mourinhos mposhtën 4-0 Burnley, ndeshje kur Gareth Bale u shfaq protagonist me dy gola dhe një asist.
Uellsiani po rikthehet gradualisht në formën e tij më të mirë dhe një gjë e tillë veçse e lumturon trajnerin portugez. Mourinho vlerëson sulmuesin e njohur dhe nuk i kursen thumbimet ndaj gazetarëve.
“Gareth Bale është një lojtar me përvojë dhe e njeh trupin e tij më mirë se çdokush tjetër. Do të ishte bukur nëse ai do të shprehej se e kam menaxhuar mirë situatën e tij, por unë nuk jam ai lloj tipi.
Ai e di që ne jemi gati për ta ndihmuar në çdo moment, në mënyrë që të ndihet futbollist i lumtur. Jam shumë i kënaqur me të. Ka raste kur njerëzit mendojnë se ju gazetarët shpikni histori të ndryshme.
E keni të nevojshme të shkruani histori, ndonjëherë ju pëlqen të thoni gjëra jo të vërteta. Por nuk ka asnjë trajner në botë që nuk do e aktivizonte Bale kur ai ndodhet në formë“, deklaroi Mourinho. /abcnews.al
