Ambasadorja e Zvicrës në Moskë, Krystyna Marty Lang është thirrur në Ministrinë e Punëve të Jashtme të Rusisë për shkak të hapave të ndërmarra nga vendi i saj kundër aseteve ruse.
Në deklaratën me shkrim të MPJ ruse thuhet se ambasadorja Lang është thirrur në ministri dhe se është dënuar hapi i Parlamentit të Zvicrës për sekuestrimin e aseteve të ngrira ruse.
“Sekuestrimi i aseteve ruse është në kundërshtim me të drejtën ndërkombëtare. Çdo cenim i aseteve të Rusisë nën maskën e një mekanizmi kompensimi nuk është gjë tjetër veçse vjedhje në nivel shtetëror”, thuhet në deklaratën e MPJ ruse.
Më tej theksohet se ambasadorja Lang është informuar se “nëse Zvicra do të ndërmerrte konkretisht hapa për sekuestrimin e aseteve ruse, Rusia do të ndërmerrte hapa të ngjashme”.
Në votimin e mbajtur në Parlamentin e Zvicrës më 7 mars, u miratua përdorimi i aseteve të ngrira ruse për Ukrainën. Zvicra ka ngrirë asete me vlerë rreth 9 miliardë dollarë që i përkasin Rusisë.
