Ministria e Brendshme e Gazës: Të paktën 19 të vrarë nga sulmi ajror izraelit pranë spitalit

Të paktën 19 persona kanë mbetur të vrarë në një sulm ajror izraelit në një shtëpi pranë një spitali në kampin e refugjatëve Jabalia në veri të Gazës të mërkurën, ka thënë Ministria e Brendshme e Gazës, teksa mijëra civilë të tjerë janë larguar drejt jugut për të shmangur luftimet e ashpra tokësore Izrael-Hamas, raportoi Reuters.

Siç është bërë e ditur, ky sulm ishte i treti në kampin më të madh të refugjatëve të Gazës brenda një jave. Sulmet ajrore në Jabalia, brenda qytetit të Gazës, të rrethuar nga forcat e blinduara izraelite, kanë rritur alarmin ndërkombëtar për numrin e madh të civilëve të vrarë në enklavën bregdetare.

Izraeli ka fajësuar Hamasin për vdekjet e civilëve në Gaza, duke thënë se po i përdor ata si mburoja njerëzore dhe po fsheh qendrat e armëve dhe operacioneve në zonat e banuara. Të mërkurën gjatë ditës, mijëra civilë palestinezë janë larguar nga veriu gjatë një mundësie katër-orëshe të shpallur nga Izraeli.

Ushtria izraelite u ka thënë vazhdimisht banorëve që të evakuojnë veriun. Sipas dëshmitarëve, ka persona të tjerë ende të zhdukur nën rrënojat e shkaktuara nga sulmi i së mërkurës.