Meta për ndryshimet kushtetuese: Asgjësuat marrëveshjet konsensuale të 14 Janarit e 5 Qershorit

Presidenti Ilir Meta ka reaguar pas miratimit të ndryshimeve Kushtetuese në Parlament.

Sipas kreut të shtetit, akti i sotëm i “ndryshimit të njëanshëm dhe me urgjencë të pajustifikueshme të Kushtetutës nga Kuvendi me legjitimitet të cunguar, është antikushtetues dhe i papranueshëm.”

Meta, me anë të një postimi në llogarinë e tij në Facebook, Meta shprehet se dryshimi, sipas tij i dhunshëm i kushtetutës, “asgjësoi marrëveshjet konsensuale të 14 Janarit dhe të 5 Qershorit që mundësuan një proces dhe produkt gjithëpërfshirës, duke hedhur përsëri në erë mirëbesimin ndërmjet palëve, paqen sociale në vend dhe procesin e integrimit europian të Shqipërisë.”

Po ashtu, Meta e cilëson miratimin e ndyrshimeve kushtetuese si një grusht shteti ndërsa shton se askush nuk do t’i “shpëtojë përgjigjes së merituar që do të marrë nga forca e qytetarëve të bashkuar.”

Postimi i plotë:

Akti i sotëm i ndryshimit të njëanshëm dhe me urgjencë të pajustifikueshme të Kushtetutës nga Kuvendi me legjitimitet të cunguar, është antikushtetues dhe i papranueshëm!

Ndryshimi i dhunshëm i Kushtetutës asgjesoi marrëveshjet konsensuale të 14 Janarit dhe të 5 Qershorit që mundësuan një proces dhe produkt gjithëpërfshirës, duke hedhur përsëri në erë mirëbesimin ndërmjet palëve, paqen sociale në vend dhe procesin e integrimit europian të Shqipërisë.

Retorikat oportuniste dhe hipokrite të disa ndërkombëtarëve shkojnë kundër aspiratës dhe projektit strategjik të shqiptarëve për të ndërtuar një të ardhme europiane.
Asnjë bandë pengmarrëse s’do të mund t’i shpëtojë përgjigjes së merituar që do të marrë nga forca e qytetarëve të bashkuar kundër këtij grushti shteti.