Presidenti Ilir Meta këtë të premte ka reaguar në lidhje me rritjen e numrit të viktimave nga Covid në vendin tonë.
Meta përmes një postimi në rrjetin social Facebook u bën thirrje autoriteteve përkatëse që të shpalosin një plan të mirëfilltë pet vaksinimin masiv të popullsisë dhe jo vaksinim “klasor”.
Ndër të tjera kreu i shtetit në reagimin e tij ka kërkuar nga qeveria që të mos i lërë qytetarët në mëshirë të fatit por të marrë në dorë përgjegjësitë e saj dhe të rimbursojë ilaçet për të sëmurët me Covid.
Sipas Metës në këtë situatë i vetmi preokupim duhet të jetë: Mbrojta e shëndetit dhe jetës së qytetarëve.
“Dëshmitë e pacientëve të infektuar me COVID-19 dhe të afërmve të tyre tregojnë se me mijëra familje kanë humbur kursimet apo po hyjnë në borxhe në mungesë të të ardhurave të mjaftueshme për të përballuar koston e lartë të barnave dhe analizave të shumta.
Qeveria duhet urgjentisht të RIMBURSOJË pa asnjë vonesë të gjithë qytetarët, të cilët janë kuruar në shtëpi dhe t’u garantojë ILAÇET FALAS të gjithë të infektuarve.
Dokrrat me “shëndetësinë falas” dhe çdo demagogji tjetër duhet të marrin fund!
Qytetarët nuk mund të lihen më në mëshirë të fatit përballë një virusi kaq të rrezikshëm, që vetëm dje mori 21 jetë, shifër rekord për numrin ditor të viktimave.
Urgjentisht të bëhet transparent plani i vaksinimit masiv dhe jo “klasor” i popullatës dhe të ndryshohet rrënjësisht strategjia antiCOVID, mbështetur mbi këshillat e specialistëve më të mirë epidemiologë, virologë e imunologë brenda e jashtë vendit.
“Babëzia” në pandemi është edhe më kriminale!
I vetmi prioritet dhe preokupim duhet të jetë: Mbrojta e shëndetit dhe jetës së qytetarëve! “, shkruan Meta.e.su./abcnews.al
