Lulzim Paci, mësuesi nga Kosova është bërë viral në TikTok falë videove që ndan duke kërcyer. Megjithëse, profesori i biologjisë është përballur me shumë komente negative, kanë qenë të shumtë ata që kanë treguar një mbështetje të madhe ndaj tij. Ai ka fituar zemrat e mijëra përdoruesve duke e cilësuar si “Profa i Tik Tok-ut”.
Së fundmi, përdoruesit e rrjetit social kanë nisur një sfidë në përkrahje të profesorit, “ProfaChallenge”. Paci dha një intervistë mëngjesin e sotëm për emisionin “Abc-ja e mëngjesit” ku iu përgjigj kritikave që ka marrë. Ai u shpreh se këto video që realizon nuk i konsideron aspak fyese dhe se përmes tyre promovon kulturën shqiptare.
“Ndoshta jam gabim por mendoj nuk është aspak degjeneruese. Është promovim dhe kultivim i vlerave tona kombëtare. Unë nuk mund të ndikoj ne mendimet e njerëzve, ka të drejtë të shprehë mendimin e vet por do të vijë koha që ata e kanë pasur gabim.”, tha mësuesi. Në mesin e atyre që ka reaguar ashpër ndaj tij, është dhe deputetja e VV-së, Fjolla Ujkani, e cila ka kërkuar që të merren masa ndaj tij. /abcnews.al
